到今日8月15號到底係咩日子呢？
喺138年前嘅今日，即係1878年嘅8月15號，中國推出第一套「蟠龍圖」郵票，亦係中國歷史上第一套嘅郵票。
呢套郵票，全套一共有3枚郵票，當中嘅圖案係相同嘅，只係佢地嘅顏色唔同，用嚟區分三個面值。當中嘅綠色為一分銀，紅色為三分銀，黃色為五分銀。上方嘅兩個角落頭，就印有“大清”兩個字，而郵票嘅中心部分就印有清朝皇室嘅象徵，亦即是蟠龍喇！
如果大家蟠龍無乜印象嘅話呢，有印象睇清朝嘅古裝片呢，咪有一面清龍旗上面嘅呢，就係「蟠龍」喇！
其實郵票嘅發明，最早係出現1840年嘅英國嘅，只係早中國38年㗎咋，當時就係為咗減低郵費，同埋方便郵政嘅效率而誕生嘅。
隨住郵票嘅應用愈嚟愈普及，市面上亦隨之而出現咗郵票語言。即係話連貼郵票嘅方法都有佢嘅意思㗎。
例如：
郵票的上端向下表示：我很愛你，但是卻不敢向你傾訴衷情！
郵票向右傾斜表示：我決不再生你的氣！
兩張郵票傾斜著對貼表示：我只想單獨地和你在一起
嗱，至於香港呢，一般我地都會打直貼喺信封嘅右上角嘅，以方便郵局嘅朋友幫我地寄信喇！作為一個浪漫嘅人，聽到可以示愛嘅郵票語言，係有啲心鬱鬱嘅。之但係作為一個浪漫得嚟又有啲理性嘅人呢，我就專程打去郵政局問嚇。職員話我知，原來當郵票唔係貼貼喺右上方嘅話，佢地就要用人手處理。麻煩到人之餘，仲有機會令信件延誤。
其實你都寄信㗎喇，有咩咪寫喺封信入面囉～
撰文：嘉朗
查看原文>>
資料來源： 2016-08-15 DBC 數碼電台